WordPress virkar ekki fyrir mig þannig að ég hef ákveðið að flytja mig um sett á: www.jonomar.blog.is, ég harma ef þessi breyting  hefur valdið þér óþægendum.

Heimurinn er undarlegur og forgangsröðun heimsins er einnig undarleg. Þann 17. október 2006 ákváðu Íslendingar að hefja hvalveiðar í atvinnuskyni á grundvelli stefnu stjórnvalda um sjálfbæra nýtingu lifandi auðlinda hafsins. Heimilt er að veiða 9 langreyða og 30 hrefnur en hafrannsóknarstofnun telur að veiðar á allt að 400 hrefnum og 200 langreyðum samrýmast markmiðum um sjálfbæra nýtingu.  Samkvæmt mati Alþjóða hvalveiðiráðsins eru 25800 langreyðar og 43000 hrefnur við landgrunn Íslands. Þannig hefur ríkisstjórnin heimilað veiðar á innan við 0,02% langreyða og 0,04 % hrefna við landgrunn Íslands. Íslendingar eru því orðnir hættulegri en Norður Kórea og Al queda til samans 
Umhverfissamtök og þjóðir heims mótmæla. Sjávarútvegsráðherra BNA fordæmir hvalveiðum Íslendinga, sjávarútvegsráðherra Bretlands hótar að slíta stjórnmálasambandi við Íslendinga, Ástralar hóta öðru eins og allir fjölmiðlar heims eru uppfullir af lygasögum og einhliða málflutningi misheppnaðra stjórnmálamanna. Það sorglega við þetta allt er að misvitrir stjórnmálamenn nota hvalveiðar íslendinga til þess að breiða yfir önnur alvarlegri vandamál á alþjóðavísu. Í Ástralíu dvelja 15000 ólöglegir innflytjendur  í fangabúðum án dóms og laga og hafa margir dvalið þar í næstum 3 ár. Bandaríkjamenn hafa samþykkt heimild til þess að pynta grunaða hryðjuverkamenn og Bretar dæla kjarnorkuúrgangi í hafið eins og þeim sé borgað fyrir það (þeir fá borgað fyrir það). Daglega deyr fólk í þúsundavís því það á ekki hnífs og skeiðar, þjóðarmorð er raunveruleiki í Súdan, nýnasistum fjölgar á ný og svona má lengi telja. Með samstilltu átaki stórþjóða veraldar væri hægt að koma í veg fyrir þjóðamorðin í Súdan og hungursneyð 3ja heimsins, en hvers vegna er ekkert gert? Þjóðarleiðtogum er nákvæmlega sama því það þarf fyrst of fremst að vernda hvalinn!  

Að guði skuli sjá nokkurn glaðan dag,

ég get ekki skilið það sinnislag.

Að horfa á þá neyð, já, og heyra þau óp

frá hnetti, sem hann til gleði skóp.

Hann sorgleikaskáld víst með afbrigðum er,

ef unað hann hefur af því, sem hann sér.

Að hugsa sér auga guðs horfa á það

og hugann því minnsta skyggnast að,

þó sitja þó rór á sínum stól

á svipinn svo hlýr sem morgunsól,

og lyfta ekki hendi að laga neitt.

Það líkist ei mér – ég skil það eitt.

Ólöf frá Hlöðum

Endilega gerið athugasemdir og tjáið hugrenningar ykkar um þetta ljóð. Ég er í námskeiði sem heitir Þjáning og illska í kristinni trúarhefð, námskeiðið er mjög spennandi og eitt af verkefnum okkar er að skrifa hugleiðingu út frá þessu ljóði. Mér finnst ljóðið mjög flott og það vekur upp margar spurningar um eðli Guðs. Í námskeiðinu erum við að lesa bók eftir guðfræðinginn Wendy Farley sem skrifaði bókina Tragic Vision and Divine Compassion. Í bókinni fjallar Farley um illskuna og þjáninguna og spyr hvers vegna? Hún hafnar því að hægt sé að útskýra alla þjáningu og illsku í veröldinni með tilvísun í Genisis 3, sum þjáning er einfaldega ekki hægt að útskýra eða réttlæta og þá þjáningu kallar hún rótttæka þjáningu. Illskan sem kemur fram í Jobsbók er rótttæk þjáning. Syndin skv. Gen 3 varð til þess að við erum dauðleg. Syndin er hluti af mannlegu eðli og vill það vonda og þá er þjáningin sanngjörn vegna þess að maðurinn hefur kallað hana yfir sig. Rótttæka þjáning kemur utan frá, hún brýtur fólk niður og tortímir mennsku þess

Andsvar Farleys við þjáningunni er Guð sem þjáist. Guð sem dó á krossi, Guð sem er Guð kærleikans en ekki eingöngu Guð drottnunar. Hún leggur áherslu að Guð líði með hinum þjáðu, með – líðan (compassion), með – líðan er birtingarform kærleikans sem vinnur að því að yfirvinna og endurleysa illskuna. Meðlíðan er er holdgerving guðlegrar elsku sem birtist í Kristi, hún er kærleikur sem bregst við þjáningu með því að bjóða fram huggun, lækningu og styrk handa þeim sem þjást. Sagan um miskunnsama samverjann minnir hinn kristna á hlutverk sitt sem er að vera holtekning þessarar guðlegrar elsku og vera farvegur fyrir elsku Guðs inn í heim þar sem sinnuleysi hefur tekið völdin.

Endilega gerið athugasemdir sérstaklega við ljóðið því ég á að vinna verkefni um það og hefði gaman um að heyra hugrenningar ykkar.

Í gær barst mér bréf frá Englandi það var dagsett 20. ágúst og hefur það því verið frekar lengi á leiðinni yfir hafið. Enda þarf oftast ekki nema þrjá sólarhringa. Þegar ég grandskoðaði umslagið tók ég eftir því að á umslagið var stimplað: “MISSENT TO JAKARTA, INDONESIA”. Þar kom skýringin á því hversu lengi bréfið var á leiðinni einhver hafði ruglast á REYKJAVIK, ICELAND og JAKARTA, INDONESIA.

Pressan í bloggheiminum er mikil. Fyrir nokkrum árum var ég duglegur bloggari svo duglegur að það kom fyrir að ég bloggaði tvisvar og jafnvel þrisvar sama dag. Svo kom hnignunartímabil í blogg ævintýri “jongunna” því lauk 31. október 2005 þegar ég ákvað að hætta að blogga. Ástæða þess var sú að ég var orðinn langþreyttur að því áreiti sem fylgir því að hafa eitt sinn verið góður bloggari “hva’ á ekki að blogga tvisvar í dag?” og þegar ég bloggaði ekki svo vikum skipti þá var sagt “rosalega ertu lélegur bloggari”, ég sem áður hafði bloggað margfalt meira en þetta fólk! Þegar mánuður leið á milli blogga þá kom þyngsta höggið “þú hefur verið fjarlægður af tenglalistnaum hjá mér” meira segja mínir bestu vinir gáfust upp á mér. Algjör höfnun í bloggheimum, hjarta mitt brotið og andi minn kraminn.

Eftir að hafa legið í dvala í tæpt ár og safnað kjarki tók ég mig til og opnaði nýjan vef á haustdögum 2006. Það gekk vel til að byrja með en svo kom upp vandamál ég fór aftur í Vatnaskóg til að vinna á fermingarnámskeiði 15. ágúst og síðan þá hef ég ekkert bloggað fyrr en nú og á því er ósköp eðlileg skýring þann 24. ágúst slitnaði símataug yfir Laxá í Leirársveit og var það í gegnum þessa símataug sem Vatnaskógur tengdist við alheiminn. Þess vegna hef ég ekki getað bloggað undanfarið. Ekki er hægt að laga línuna fyrr en laxveiðitíminn er búinn undir lok september.

Hinar sjálfskipuðu blogglöggur voru ekki lengi að fara af stað því fljótlega fór ég að heyra: “Þú ert ekkert búinn að bæta þig í blogginu”, “þú ert orðin lélegur bloggari strax” og það besta eða mest ógnvekjandi var nafnlausa SMSið sem ég fékk sent kl. 08:00 að morgni “bloggaðu”.

Klukkan 15.40 lauk ég mínu fyrsta og vonandi síðasta sumarprófi það er nákvæmlega ekkert sniðugt við það að taka sumarpróf! Hvernig á maður að komast í prófgírinn í ágúst eftir næstum því 3 mánuða frí frá skólanum, en þetta er þó búið. Sólin skín og ég er glaður að vanda og hlakka til að slaka á í kvöld. Á morgun fer ég aftur heim í heiðardalinn eða Svínadalinn þangað sem að kát fermingarbörn eru komin til að leika og læra. Annars er ýmislegt…. að gerast í dag eiga heiðurshjónin Þorgeir og Hlín að koma til landsins sem og Þráinn Haraldsson vinsælasti íslendingurinn og sá eini í Omo Rate 1. júli 2006 – 4. júlí 2006. Það verður gaman að fá kappann heim eftir 3. mánaða fjarveru og gaman verður að fá að sjá hvað hann keypti fyrir mig.

Stúdentagarðar FS: Úthlutun íbúðar! Á skýjuðum ágústdegi blöstu þessi orð við mér er ég opnaði pósthólfið mitt á uglu HÍ. Í um það bil 1 ár hef ég verið á biðlista eftir stúdentaíbúð, en eins og margir vita hefur fjölskylda mín staðið í deilum í tvö ár við sveitfélagið Mosfellsbær um byggingarheimildir. Deilan er þess eðlis að aðeins menn með hrl. á eftir nafni sínu geta útskýrt hana svo ég læt það vera. Ekki sér fyrir endann á deilunni og á meðan má ekki klára húsið þannig að ég og systir mín höfum lifað nokkurs konar flökkulífi en þó ávallt samastað. Ég hef til dæmis verðið svo heppinn að njóta gestrisni Svensongengisins í Jakaseli 29. Það kemur sér sem sagt mjög vel að fá þessa íbúð hún er líka nokkuð glæsileg. Íbúðin mín er á fjórðu hæð með útsýni yfir faxaflóa, en töluvert ódýrari en íbúðirnar í nágranna – fjölbýlishúsinu þar sem meðal íbúð kostar milli 50 – 60 milljónir. Þannig hver veit nema að haldin verði kaffi/teboð að hætti Lutheran Dudes, Leaders in Wasserwald, Serafa, KSF-inga, guðfræðinema. eða hverjum öðrum félagskap sem ég tel mig tilheyra.

Þá er það fyrsta alvöru færslan, ég er ekki enn orðinn alveg sáttur við útlit síðunnar og hún mun eflaust taka nokkrum breytingum. Ég á í það minnsta eftir að íslenska hana og gera mögulega örfáar breytingar á leiðaranum(header).

Undanfarið hef ég verið í bænum að lesa fyrir trúarlífssálarfræðiprófið sem ég varð að fresta síðustu jól þar sem að það var árekstur í próftöflu minni. En þetta hefur verið róleg törn ég hef í það minnsta ekkert verið að útkeyra mig í próflestri. Prófið er á morgun og ég á ekki von á öðru en að það gangi ágætlega enda vel gefinn drengur þar á ferð!

Þá er komið að því að ég Jón Ómar fari að blogga aftur eftir langt og dapurlegt hlé. Síðastliðin tvö ár hafa verið hnignunartímabil á bloggferli mínum og er komin tími til þess að hefjast handa við uppbyggingu bloggferilsins á ný. Ég bið lesendur að fyrirgefa þó að lítið verði bloggað í upphafi þar sem að nú er unnið að uppsetningu vefsins.